Олоҥхо аныгы үйэ оҕолоругар

Создано: 29.11.2018, обновлено: 29.11.2018

П. А. Ойуунускай төрөөбүтэ 125 сылыгар ананар
Социальнай партнердар

Оҕо уһуйаанын методиһын кытта Иванова Зоя Алексеевналыын сүбэлэһэн бараммыт П. А. Ойуунускай олоҥхотунан иитээччилэр авторскай үлэлэрин сырдатар сыаллаах холбоһук тэрээһини сэтинньи 14 күнүгэр ыыттыбыт. Уһуйаан спортивнай саалатыгар оскуолаҕа киириэн иннинээҕи саастаах оҕолор уонна оҥоһук автордара муһуннулар.

Дьэ, олус интэриэһинэй уонна умсугутуулаах дьарыктар саҕаланнылар.

Бастакы автор — Кычкина Татьяна Петровна — «Дьулуруйар Ньургун Боотур» олоҥхоттон быһа тардан билиһиннэрдэ, геройдар ойууларын көрдөрдө. Бэйэтэ оҥорбут кубиктарынан оонньотто, оонньуу оҕо өйүн сайыннарарга уонна илиилэрэ имигэс буолалларыгар анаммыттар.

Иккис автор – эдэр иитээччи Лилия Ивановна Жиркова. Кини хас да үлэтин көрүҥүн билиһиннэрдэ. Ол курдук полимернай глинаттан акриловай кыраасканан оҥорбут олоҥхо геройдарын көрдөрдө. «Олоҥхо дойдута» диэн лотота сиэптэрдээх, онно геройдар туттар атрибуттара кыбылла сылдьаллар, кэннигэр иитээччилэргэ, төрөпүттэргэ анаан информациялары бэлэмнээбит, үлэлэрин ламинааттаабыт. «Олоҥхо дойдутун оһуора» диэн бэрт интэриэһинэй доминоны толкуйдаабыт, дириҥ ис хоһоонноох оҥоһук эбит – харысхаллар бэлиэлэрин билэргэ туһаайыллыбыт. Тарбахха кэтэрдиллэр олоҥхо геройдарын куклаларын аныгы матырыйаалынан фетрынан оҥорбут. Хамсаныыны сайыннарар сыаллаах оруолларынан үллэстэн оонньууларыгар анал көстүүм тикпит, бухатыыр туттар тэриллэрин оҥорбут. Интеллектуальнай эккирэтиилээх Сонор оонньууну оҥорбут, геройдара олоҥхо персонажтара. Биир киһи элбэх араас ньыманан оҥоһуктары толкуйдуура, сатыыра сөхтөрөр.

Дьиэ кэргэнинэн олоҥхону пропагандалыырга кылааттарын Матрена Алексеевна, Егор Николаевич Жирковтар киллэрэллэр. Ол курдук хаамыылаах оонньууну, сонору толкуйдаабыттар, фанераҕа уруһуйдаан, лаахтаан хамылык оонньууру оҥорбуттар. Бу үлэлэрин методист билиһиннэрдэ.

Оҕолор дуоһуйа оонньоотулар, ким эрэ бухатыыр, ким эрэ Туйаарыма Куо… Саала тухары истиҥ эйгэ үөскээтэ.

Ииттээччилэр олус талааннаахтар — үлэлэригэр айымньылаахтык сыһыаннаһаллар. Олоҥхо уустук эйгэтигэр оҕолору аныгылыы остуол оонньуулар нөҥүө угуйаллар, П. А. Ойуунускай олоҥхотун, айымньыларын таптыырга үөрэтэллэр.

Им И.Н.,
модельнай библиотека сэбиэдиссэйэ,
Иванова З.А.,
«Кэнчээри» уһуйаан методиһа