“А5аларбыт бастакы ситиһиилэрэ” (Сэбиэдиссэй Егорова Е.Е.)

Создано: 10.10.2018, обновлено: 10.10.2018

2018 сылга Кэбээйи улууһун Мукучу нэһилиэгин 15№-дээх “Кэнчээри” уһуйаан аҕалары кытта үлэни республика таһымыгар таһаарар баҕа санааттан Лена Дмитриевна Троева сүбэтинэн, республиканскай аҕалар Союзтарыгар киирбиппит. Бу аҕалар Союзтара — республикаҕа аҕалары кытта үлэҕэ уһуйааннар кластернай икки өттүттэн ситим буолар. Союз 10 улууһу түмэн үлэлэтэр: Бүлүү, Горнай, Нам, Нюрба, Усть-Алдан, Таатта, Томпо, Чурапча, Дьокуускай уонна Кэбээйи улууһа. Сүрүн сыала-соруга аҕа статуһун үрдэтии, этно уонна гендернай педагогикаҕа үчүгэй үлэ опытын тарҕатыы, уһуйааннар үлэлэрин түмүү буолар.
2018 сыл бэс ыйын 29 күнүгэр “Кэнчээри” уһуйаан аҕалары кытта үлэҕэ творческай бөлөҕө аҕалары түмэн, Педярмарка чэрчитинэн ыытыллыбыт республиканскай Аҕалар түһүлгэлэригэр Горнай улууьун Бэрдьигэстээх сэлиэнньэтигэр кыттан кэллибит. Сэбиэдиссэй Е.Е.Егорова, педагогтар Жиркова М.А., Иванова М.С., Жиркова Л.И., Софронеева Р.А. нэһилиэк аҕаларыгар ыҥырыы таһааран, элбэх тэрээһин үлэтин тэрийтэ. Ол курдук, уһуйааҥҥа аҕалары кытта үлэни сырдатар матырыйаал чөкөтүллэн бырайыак чопчуламмыта. Республиканскай быыстапкаҕа нэһилиэк талааннаах аҕаларын үлэлэрэ мунньуллубута, күрэххэ кыттар хамаанда таҥаһа-саба оҥоһуллубута.
Нэһилиэкпит, улууспут чиэһин көмүскүүргэ маннык аҕалар сөбүлэспиттэрэ:
1. Жирков Егор Николаевич – Дом детского творчества педагога.
2. Софронеев Афанасий Иванович – ГУП ЖКХ үлэһитэ.
3. Иванов Николай Николаевич – Администрация эдэр ыччат лидера.
4. Кычкин Петр Петрович – Дайан сынньалаҥ киин үлэһитэ.
5. Алексеев Ким Алексеевич – ЛенаГаз үлэһитэ.
6. Кычкин Петр Кириллович – безработнай.
7. Иванов Иннокентий Иннокентьевич – Мукучутааҕы баһаарынай чаас үлэһитэ.
Маны таһынан, муусукабытын, тыаспытын-ууспутун салайар Дайан сынньалаҥ киин звукорежиссера Сидоров Еремей Семенович барсыбыта.
Маннык хамаандалаах, уопсайа 13 киһилээх айаҥҥа туруммуппут.
Горнай улууһун Бэрдьигэстээх сэлиэнньэтигэр аҕалар түһүлгэлэрэ стадиоҥҥа тэриллибитэ. Хара сарсыардаттан хойут киэһээҥҥи диэри тэрээһин арааһа ыытыллыбыта. Ол курдук, Аҕа түһүлгэтэ улуустар уопсай парадтарынан арыллыбыта. Уопсайа 6 улуус кыттардыы тэринэн кэлбит этилэр: Бүлүү, Горнай, Кэбээйи, Ньурба, Нам, Дьокуускай. Улуустар аҕаларын биир тэҥ таҥастара, былаахтара, гербэлэрэ ча5ылхайа киһи хараҕар быраҕыллар парад буолбута.
Маны сэргэ, аҕалар хоббиларын, оҥоһуктарын, аҕалары кытта үлэлэр проектарын выставкалара аһыллан үлэлээн барбыттара. Педярмарка ханнык баҕарар кыттыылааҕа сэргээн көрөр бэртээхэй выставката этэ. Араас хоббилаах, уран илиилээх республика аҕаларын үлэлэрэ түмүллүбүтэ. Биһиги нэһилиэкпититтэн маннык аҕалар үлэлэрэ кыттыбыта:
— Гоголев Сергей Петрович- бэйэтэ тикпит таҥастара.
— Софронеев Виталий Иванович- оҕолорго оҥорбут пазла.
— Кычкин Дмитрий Васильевич — оҕолорго оҥорбут пазла.
— Жирков Егор Николаевич – мастан оҥоһуктара.
Бу оҥоһуктары суулаан-харыстаан илдьэ барбыт педагогтарбытыгар Жиркова Матрена Алексеевнаҕа, Софронеева Розалия Андреевнаҕа махталбытын тиэрдэбит.
Онтон дьэ аҕалар күрэхтэрэ саҕаламмыта. Бастаан утаа аҕалар хамаандаларын презентация конкурса буолта. Манна биһиги аҕаларбыт “Дуоҕа Боотур” общественнай түмсүү көмөтүнэн (Сал. Павлов Николай Олегович), бу түмсүү гербэтин, былааҕын өрө тутан, “Дуоҕа боотур” аатынан киирсибиттэрэ. Агит-Брейк этабыгар саха фольклорун, олонхотун өрө тутуҥ диэн ыҥырыынан, олонхону быһа тардан көрдөрүүлэрин, дьон-сэргэ сэргээн истибитэ-көрбүтэ. Маны таһынан, интеллектуальнай этапка аҕалар араас хайысхалаах боппуруостарга эппиэттээбиттэрэ.
Салҕыы аҕалар спортивнай күрэхтэрэ ыытыллыбыта. Этаптарынан сүүрүү, ыстаныы, бөтүүктэһии, ыраа5ы быра5ыы буолтара. Тыҥааһыннаах киирсиигэ күүстээхтэр, быһыйдар быһаарыллыбыттара. Биһиги аҕаларбыт хамаандалара ыстаныыга 3 миэстэ, бөтүүктэһиигэ 3 миэстэ буолбуттара.
Спортивнай күрэх кэнниттэн “Бигэ туруктаах аҕа — дьиэ кэргэн тирэҕэ” республиканскай күрэх саҕаламмыта. Манна нэһилиэкпит биир уус талба илиилээх аҕата Егор Николаевич Жирков кыттыбыта. Бу куонкурска уопсайа 7 аҕа күөн көрсүбүттэрэ. Аҕа кыаҕын, дьоҕурун арыйар күрэх буолан биэрдэ. Түмүгүнэн Бүлүү улууһун аҕата кыайыылаах буолта. Егор Николаевичка олус үчүгэйдик кыттан, “Дьоһун-мааны Ытык аҕа” анал аат иҥэриллибитэ. Куонкурс түмүктэммитин да кэннэ Егор Николаевичка дьон-сэргэ кэлэн ыйыталаһар, интириэһиргиир этилэр. Онон кырдьык да Егор Николаевич тыла-өһө баайа, талааннаах киһи буолан, көрөөччүлэр болҕомтолорун тардан, биһирэбил ылыан ылбыта.
Бу республиканскай куонкурс уопсай түмүгүнэн, биһиги хамаандабыт кэккэ ситиһиилэнэн, үөрүү өрөгөйүн билбиппит:
1. Республиканскай проектар күрэхтэригэр педагогтар Жиркова Л.И., Софронеева Р.А., Иванова М.С. уһуйааҥҥа ыытыллар “Хоһуун түмсүү – Детско-взрослое сообщество” диэн проектара кыайыылаах буолла.
2. Аҕаларбыт хамаандалара “А5а волонтерскай хамсааьына” этап Кыайыылаа5а буолла.
3. республиканскай быыстапка түмүгүнэн Егор Николаевич Жирковка соҕотох “Бастыҥ Аат” иҥэриллибитэ.
3. Спортивнай күрэх түмүгүнэн аҕаларбыт хамаандалара 4 хамаанданы кэннилэригэр хаалларан, 2 миэстэ буолан үөрүүбүт үксээбитэ.
Биир тэрилтэ республикаҕа кыттара ыарахаттардаах буолар. Онуоха күүс-көмө буолбут тэрилтэлэрбитигэр махталбытын тиэрдэбит..
— Мукучутааҕы гимназия тэрилтэтигэр (Директор Саввинова М.И.).
— Мукучу нэһилиэгин администрациятыгар (Баһылык Сысоева А.И.).
— Дуоҕа Боотур общественнай түмсүүгэ (сал. Павлов Н.О.)
— Музыкальнай оскуола тэрилтэтигэр (сал. Борисова А.Н., хореограф Иванова О.А.).
— Сынньалаҥ киин тэрилтэтигэр (сал. Кудрина К.Б.).
— Модельнай библиотека тэрилтэтигэр (сал.Им И.Н.)
— Звукорежиссербытыгар Еремей Семенович Сидоровка.
— Уонна мэлдьи тэрээһиннэрбитигэр күүс-көмө, өйөбүл буолар уһуйаан прфкомитетыгар (предс Прокопьева И.Н.).
Бастакытын улахан республиканскай таһымнаах тэрээһиҥҥэ кыттан аҕаларбыт бириистээх миэстэлэри ылбыттарыттан олуһун үөрэн, дуоһуйан кэллибит. Бу кыайыы аҕаларга да, уһуйаан үлэһиттэригэр да кынат буолар. Мантан салҕыы нэһилиэкпит, улууспут аҕалара түмсүүлээх буолан араас тэрээһиннэргэ, акцияларга актыыбынайдык кыттыахтара диэн олус эрэнэбит. Кэнчээри уһуйаан аҕалары кытта үлэтэ атын уһуйааннарга холобур буолан, аҕалары улууска түмэ тардара буоллар диэн баҕа санаалаахпыт.
Маннык республиканскай үрдүк таһымнаах Аҕа түһүлгэтин тэрийбит Лена Дмитриевна Троеваҕа, ЖИПТО Сонор Федерация5а, Лига отцов РС (Я) уонна кинилэргэ көмөлөһөн сүүрбүт-көппүт уһуйааннарга Махталбытын тиэрдэбит! Аҕа оруолун үрдэтэр тэрээһиннэр өссө да маннык үрдүк таһымнаахтык ыытылла турдуннар, кыттар улуустар ахсааннара эбиллэ турдун!